Policia e Kosovës ka deklaruar se situata e sigurisë në veri të vendit edhe sot vazhdon të jetë e njëjtë që “nga vendosja e barrikadave nga grupet kriminale”. Përveç barrikadave, edhe dy pikat kufitare Jarinje dhe Bërnjak vazhdojnë të jenë të mbyllura, raporton Gazeta Sinjali.
Në njoftimin e PK-së thuhet se grupet kriminale po pengojnë lirinë e lëvizjes së qytetarëve dhe qarkullimit të mallrave, por pavarësisht kësaj, Policia është e angazhuara për të kryer detyrat në interes të sigurisë.
“Pavarësisht akteve kriminale dhe sulmeve të raportuara ndaj personelit të sigurisë, personelit monitorues ndërkombëtar dhe mediave, Policia e Kosovës vazhdon të mbetet vigjilente dhe e angazhuar në nivelin dhe moralin më të lartë të kryerjes së detyrave kushtetuese dhe ligjore, në interes të sigurisë së përgjithshme.
Policia e Kosovës, në kuadër të vlerësimeve dhe planifikimeve operacionale, me kohë ndërmerr masat e sigurisë, masat e nevojshme mbështetëse dhe logjistike, përfshirë veshmbathjen dhe ushqimin për personelin e saj në detyrë.”, thuhet në njoftim.
Po ashtu, Policia ka reaguar edhe për spekulimet e mediave serbe, se gjoja se zyrtarët policorë të angazhuar në veri kanë sjellje të vrazhda, duke thënë se raportime të tilla nuk qëndrojnë dhe janë të pavërteta.
“Ashtu siç e kemi theksuar edhe më parë Policia e Kosovës do të vazhdojë të angazhohet për ofrim të sigurisë ndaj të gjithë qytetarëve pa dallime, sjelljen para organeve të drejtësisë së personave të dyshuar, si dhe ruajtjen e rendit kushtetues të Republikës së Kosovës.
Policia e Kosovës e bazon punën në vlerat e saja si profesionalizmi, përgjegjësia dhe integriteti, në kuadër të të cilave ofron siguri dhe trajton të gjithë qytetarët pa dallime, andaj spekulimet e vazhdueshme nga mediat, kryesisht serbe, se gjoja zyrtarët policorë në veri të vendit kanë sjellje jo të mira, të vrazhda dhe jomiqësore ndaj komunitetit serb, nuk qëndrojnë dhe janë të pavërteta.”
