Policia e Kosovës ka arrestuar dy persona të dyshuar për përfshirje në veprën penale të narkotikëve, ndërsa ka konfiskuar afro 18 kilogramë substancë të dyshuar si marihuanë.
Sipas njoftimit të policisë, ngjarja ka ndodhur më 19 qershor rreth orës 17:30, kur hetuesit e Stacionit Policor në Kaçanik kanë tentuar të ndalojnë një veturë për kontroll. Siç thotë policia, drejtuesi i automjetit nuk iu bind urdhrit të policisë dhe përkohësisht arriti t’i shmangej kontrollit, shkruan Insajderi.
“Më pas njësi të ndryshme policore arrijnë që veturën ta lokalizojnë dhe ta ndalojnë. Policia, konkretisht hetuesit policorë nga Njësia e Drejtorisë për Hetimin e Trafikimit me Narkotikë (DHTN)- Ferizaj, duke kontrolluar rrugën nga dyshohej se ishte larguar vetura, në një vend me mbeturina kanë gjetur të hedhura tre thasë me substancë që dyshohet të jetë narkotike e llojit marihuanë. Substanca narkotike dyshohet të jetë hedhur nga vetura që i ishte shmangur ndalimit policor”, thuhet në njoftimin e PK’së.
