Saranda Stublla, Drejtoreshë për Pronë, Kadastër dhe Gjeodezi në Komunën e Podujevës, ka bërë të ditur se do të garojë për një vend në Kuvendin Komunal në zgjedhjet e ardhshme. Ajo tha se ky vendim vjen pas një mandati të përkushtuar në administratë, ku ka punuar për transparencë, dixhitalizim dhe mbrojtje të pronës publike. Stublla u zotua se do të angazhohet për zhvillim të drejtë dhe gjithëpërfshirës në shërbim të qytetarëve.
Postimi i Plote:
Të dashur qytetarë të Podujevës,
Me përgjegjësi dhe përkushtim ndaj qytetit tonë, dua t’ju njoftoj se në zgjedhjet e ardhshme do të jem pjesë e listës për Kuvendin Komunal të Podujevës. Ky vendim vjen pas përvojës sime si Drejtoreshë për Pronë, Kadastër dhe Gjeodezi në Komunën tonë – një pozitë që më ka dhënë mundësinë të kuptoj më thellë nevojat dhe sfidat me të cilat përballen qytetarët çdo ditë.
Gjatë mandatit tim, jam angazhuar për transparencë, rregullim të çështjeve pronësore, dixhitalizim të shërbimeve dhe lehtësim të procedurave për qytetarët dhe bizneset. Gjatë keti mandatit , e kam parë nga afër sa e rëndësishme është që prona publike të administrohet me përgjegjësi, drejtësi dhe në interes të qytetarëve. Nuk mund të ketë zhvillim të qëndrueshëm pa një bazë të qartë ligjore dhe pa mbrojtje të pasurisë sonë të përbashkët.Tani, dua të çoj përpara këtë përvojë dhe energji në një nivel edhe më përfaqësues – në Kuvendin Komunal, aty ku marrin formë politikat që ndikojnë drejtpërdrejt në jetën tonë të përditshme.
Angazhimi im do të mbetet i palëkundur për zhvillimin e drejtë, të qëndrueshëm dhe gjithëpërfshirës të Podujevës – me fokus në shërbime më cilësore, mbrojtje të interesit publik dhe rritje të transparencës.
Me mbështetjen tuaj, së bashku mund të ndërtojmë një Podujevë më të mirë për të gjithë.
Me respekt,
Saranda Stublla
Drejtoreshë për Pronë, Kadastër dhe Gjeodezi
Kandidate për Asamble Komunale – Podujevë
