Një shpërthim është raportuar se ka ndodhur të dielën në një kodrinë në Vushtrri. Sipas Policisë, para se të ndodhte shpërthimi ishte raportuar për një zjarr.
Në vendin e ngjarjes thuhet se është krijuar një gropë dhe janë gjetur edhe pjesë të armëve dhe municion.
Rasti është cilësuar si “Shkaktim i rrezikut të përgjithshëm” dhe “Armëmbajtje pa leje”.
“Gjatë shikimit të vendit të ngjarjes është vërejtur një gropë ku janë gjetur edhe disa pjesë të armëve dhe municionit si: dy karikatorë të armëve, disa këllëfë të armëve, një shufër metalike dhe municion i ndryshëm”, thuhet ndër të tjera në raportin ditor të Policisë.
Raporti i plotë i Policisë, pa ndërhyrje:
Shkaktim i rrezikut të përgjithshëm /armëmbajtje pa leje
Vushtrri / 07.09.2025 – 10:09. Pas raportimit lidhur me një zjarr në një kodrinë është dëgjuar një shpërthim-detonim. Në vendin e ngjarjes kanë dalë njësitë policore dhe zjarrfikësit që e kanë lokalizuar zjarrin. Gjatë shikimit të vendit të ngjarjes është vërejtur një gropë, ku janë gjetur edhe disa pjesë të armëve dhe municionit si: dy karikatorë të armëve, disa këllëfë të armëve, një shufër metalike dhe municion i ndryshëm. Në konsultim me prokurorin, është iniciuar rasti dhe mbetet në hetime.
