Komuna e Prishtinës kishte njoftuar se nga e premtja deri të dielën e 30 tetorit, do të vazhdojë testimi i radhës, i shndërrimit të gjithë unazës qendrore të kryeqytetit në qarkore njëkahëshe për automjetet.
I gjithë ky proces kishte shkaktuar tollovi në kryeqytet, ditën e premte. Pasi, kolona të gjata janë shkaktuar në rrugët e Prishtinës, sidomos në pjesën te Mensa e Studentëve dhe atë prapa Komunës së Prishtinës.
Qytetarët ishin të revoltuar nga pritjet dhe kolonat e gjata, por këto kolonat i provoi edhe vetë kryetari i Prishtinës, Përparim Rama.
Rama ka thënë se testimi i qarkores njëkahëshe ka qenë i nevojshëm për t’i kuptuar problemet e komunikacionit në kryeqytet.
“Kemi bërë dhe teste të mëparshme gjatë vikendit për ta testuar qendrën. Propozimet, të cilat, kanë ardhur si pjesë e testimeve për mobiliet, si pjesë e planit për testimin e mobilitetit ku e kemi bërë testimin të shtunën, të dielën, faktikisht kemi bërë për dy javë, ku para se të merret vendimi duhet që të testohet edhe gjatë javës”, ka theksuar Rama.
Po ashtu, nënkryetari i Prishtinës, Alban Zogaj, në emisionin “Magazina”, për Radio Dukagjini, ka deklaruar se pas testimit të qarkores njëkahëshe për automjetet, do të bëhen analiza me ekspertë të urbanizmit, gjersa ka shtuar se “gjatë muajit nëntor besoj do të dalim me rezultate finale”.
“Nuk mundem që nga tani të parashikoj vendimin final, pas analizave me ekspertë të urbanizmit do të dalim me rezultate dhe besoj gjatë muajit nëntor dalim me vendim final për këtë çështje”, ka deklaruar ai.
Por, pas kësaj tollovie, qetësia qëndron nga sheshi i Prishtinës deri te Katedralja “Nëna Terezë”, që gjithashtu po planifikohet të shndërrohet në hapësirë vetëm për këmbësorë.
Ky testim, sipas Komunës së Prishtinës, është duke ndodhur në bashkëpunim të ngushtë me Policinë e Kosovës.
Qarkorja njëkahëshe gjatë këtyre ditëve do të jetë funksionale në drejtim të rrugëve:
– Rruga “Agim Ramadani” që nga semaforët pranë ish-menzës së Studentëve e deri te rrethrrotullimi prapa ndërtesës së komunës.
– Rruga “UÇK” nga Parlamenti e deri te ish-Kino Rinia.
– Rruga “Migjeni” deri te ndërtesa e ish-OSBE.
– Rruga “Luan Haradinaj” deri te semaforët pranë Bankës Qendrore.
– Rruga “Ukshin Hoti”.
– Rruga “Robert Dolli”.
Ndërkaq, bëhet e ditur se rruga “George Bush” deri te semaforët pranë Katedrales dhe rruga “Garibardi” deri te semaforët pranë rrugës ”Dritan Hoxha” do të jenë të mbyllura për automjete, me përjashtim të transportit publik, i cili do të qarkullojë në këtë pjesë me shpejtësi minimale të lëvizjes.
