Në seancën ku gjykata i caktoi një muaj paraburgim Jeton Sylajt, i dyshuar për vrasjen e ish-bashkëshortes së tij, të ndjerës Arlinda Zekaj, mbrojtja e të pandehurit ka paraqitur versionin e vet lidhur me atë se çfarë ka ndodhur natën kritike.
Gjykata Themelore në Pejë i ka caktuar të martën, më 27 tetor, masën e paraburgimit Jeton Sylajt, nën dyshimin për veprën penale “Mospërfillja e gjykatës”.
Sipas vendimit që ka siguruar Gazeta Insajderi, avokati mbrojtës, Gani Kelmendi, ka deklaruar se në natën kritike, Arlinda dhe ish- bashkëshorti i saj, Jeton Sylaj, kanë pasur një mosmarrëveshjeje banale rreth larjes së rrobave.
Avokati ka deklaruar para gjykatës se natën kur ndodhi ngjarja tragjike, i dyshuari i kishte kërkuar të ndjerës që të mos i largonte rrobat nga lavatriqja derisa të pastroheshin edhe rrobat e tij. Mirëpo, sipas pretendimit të mbrojtjes, e ndjera me këmbëngulje ia kishte nxjerrë dhe hudhur rrobat e tij.
Mbrojtja ka kundërshtuar propozimin e prokurorisë për caktimin e masës së paraburgimit, duke pretenduar se i pandehuri keqardhet për rastin e ndodhur, sipas tij “pa dëshirën e tij”, dhe se ai nuk ka përdorur dhunë fizike apo fjalët e pretenduara nga prokuroria.
Sylaj, ish-bashkëshorti i Arlinda Zekajt, u paraqit para gjykatës pasi ndaj tij po zhvillohen procedura lidhur me këtë vepër penale, teksa ka zgjedhur të mbrohet në heshtje.
Zekaj u vra mbrëmjen e 25 tetorit nga ish-kunati i saj, Albert Sylaj, pak pasi kishte raportuar në Polici për dhunë në familje.
Gjatë seancës, Jeton Sylaj ka deklaruar se i vjen keq për atë që ka ndodhur dhe se është përpjekur ta parandalojë rastin tragjik. Ai ka përmendur gjithashtu se ka një fëmijë 12-vjeçar që, sipas tij, ka nevojë për kujdesin e tij.
