Hetem Vrajolli është ftuar nga organet e rendit dhe tashmë i është caktuar masa e arrestit shtëpiak për 30 ditë, pasi doli me një intervistë ku tregonte se si zëvendës-ministri i Mbrojtjes në Kosovë, Shemsi Syla e ka sharë e ofenduar derisa ky ishte shoferi i tij.
Vrajolli gjatë intervistës, pos tjerash, thotë se nuk do t’ia falë Sylës ofendimet e sharjet, sepse “ato s’ia kishte borxh”, dhe prokuroria këto i ka cilësuar si “kërcënim”.
Arrestin shtëpiak Vrajolli e ka konfirmuar vetë për Albanian Post, duke thënë se s’mund të deklarojë më shumë për momentin.
“Jam në arrest shtëpiak për 30 ditë për atë kërcënim që ia kam bë Shemsi Syles” tha ai përmes telefonit.
“Kurrgjë më shumë s’mundem me ju dhënë informata deri të lirohem”, shtoi.
Shemsi Syla ka qenë në qendër të kritikave ditët e fundit për shkak të tenderit të dështuar për angazhimin e një kompanie për furnizimin dhe përgatitjen e ushqimit për Forcën e Sigurisë së Kosovës.
Është raportuar edhe për raporte jo të mira mes tij e ministrit Ejup Maqedonci.
