Pas dështimit të votimit për formimin e qeverisë, është folur te mundësia e thirrjes së një seance të jashtëzakonshme të Kuvendit. Megjithatë, Eugen Cakolli i KDI thotë se një gjë e tillë aktualisht nuk është e mundur.
Cakolli ka sqaruar se Kuvendi nuk ka bazë ligjore për t’u mbledhur për votim të qeverisë pa përfunduar më parë hapat kushtetues të mandatarit të ri.
“Jo, nuk mund të thirret seancë e jashtëzakonshme tani për tani!”, thekson ai.
Sipas tij, deri në konstituimin e procedurave nga Presidentja, çdo kërkesë për seancë të jashtëzakonshme mbetet jashtë rregullave institucionale.
“Pas dështimit të pardjeshëm të votimit për qeverinë, së pari duhet të zhvillohen konsultimet nga Presidentja me partitë dhe të vendoset se kujt dhe NËSE do të jepet mandatari i dytë. Derisa të përfundojë kjo procedurë dhe të ketë dekret për mandatarin, Kuvendi nuk ka bazë dhe rrethana për t’u mbledhur për çfarëdo votimi, përfshirë atë të qeverisë,” ka deklaruar Cakolli.
Ai ka komentuar edhe nismën me nënshkrime të disa deputetëve, duke sqaruar se juridikisht ato nuk prodhojnë efekt.
“Nënshkrimet që po përmenden nuk kanë efekt juridik jashtë procesit të konsultimeve. Ato mund të shërbejnë vetëm si provë gjatë bisedimeve me Presidenten, në kuadër të ‘kritereve mbizotëruese’. Për më tepër, mes tjerash (por jo vetëm) për të dëshmuar shumicën nevojiten 61 nënshkrime të verifikuara, jo vetëm 40 sosh për thirrje të seancës,” ka theksuar ai.
Cakolli ka theksuar se e njëjta situatë vlen edhe për ligjin e buxhetit, pasi prioritet është formimi i qeverisë së re.
“Ngjashëm, seanca e jashtëzakonshme nuk mund të thirret as për ligjin për buxhetin. Detyra e parë dhe e patejkalueshme e Kuvendit pas zgjedhjeve është zgjedhja e Qeverisë, jo miratimi i ligjeve. Mbi të gjitha, vetëm një Qeveri e kësaj legjislature mund të propozojë projektligj për buxhetin”, shtoi ai.
