Ministri për Komunitete dhe Kthim pret që Lista Serbe të vazhdojë politikën destruktive ndaj proceseve demokratike në Kosovë.
Ministri për Komunitete dhe Kthim në Qeverinë e Kosovës, Nenad Rashiç, ka thënë se ekzistojnë informacione jo zyrtare që Lista Serbe – partia më e madhe e serbëve të Kosovës që mbështetet nga Serbi – përveç bojkotimit të zgjedhjeve lokale vitin e kaluar është duke punuar edhe për bojkotimin e zgjedhjeve nacionale vitin e ardhshëm.
“Unë pres që disa grupacione, në veçanti nga Lista Serbe, të shpallin ndonjë formë të mospjesëmarrjes në procesin zgjedhor… A do të ndodh ajo për një pjesë të Kosovës apo në tërë territorin, kjo është diçka që do ta shohim në të ardhmen”, ka deklaruar Rashiç në një përgjigje për “Dukagjini” të dielen, por duke mos dhënë detaje shtesë.
Në kuadër të masave që së fundi ka prezantuar presidenti i Serbisë, Aleksandër Vuçiç, ndër të tjera, është edhe kërkesa për zgjedhje të reja në katër komunat veriore të Kosovës – Mitrovicë e Veriut, Leposaviq, Zveçan dhe Zubin Potok – të cilat aktualisht udhëhiqen nga kryetarë shqiptarë, pas bojkotit të zgjedhjeve nga Lista Serbe.
Ministri Rashiç ka thënë se kërkesa presidentit serb për zgjedhje të menjëhershme në veriun e Kosovës të banuar me shumicë serbe është e pamundur në aspektin ligjor. Pandaj, sipas tij, kur të vijë koha e zgjedhjeve parlamentare, pikërisht kjo kërkesë do të bëhet “pretekst” për mospjesëmarrjen e Listës Serbe në raundin e ri zgjedhor.
Në Kuvendin e Kosovës, aktualisht, janë nëntë deputetë nga radhët e Listës Serbe, të cilët i kanë marrë mandatet e tyre në nëntor 2022 pas dorëheqjes së paraardhësve të tyre. Ndryshe, duke qenë se situata politike në veri mbetet akoma e tensionuar, gjithashtu edhe pjesëmarrja e Listës Serbe në zgjedhje vazhdon të mbetet e paqartë./Albanian Post
