Drejtori i institutit KIPRED, Lulzim Peci, tha se Kosova mund të pësojë keq nëse përceptohet fajtore për procesin e dialogut.
Prej pasojave që Kosova mund të ketë në këtë mes, Peci përmendi humbjen e aleancave me shtetet që e kanë mbështetur Kosovën ndër vite, shkruan Gazeta Online Reporteri.net.
“Nëse ne shpallemi fajtor dhe Serbia nuk shpallet fajtor për çështjen e Kosovës, unë mendoj që Kosova do ta humb de facto aleancën me shtetet që na kanë bërë shtet”, deklaroi tutje Peci.
Ai tha se edhe raportet me ShBA’të po ndërrojnë shpesh.
“Jemi në një situatë delikate. Ne kemi parë një lloj ngrohje të raporteve tona Shtetet e Bashkuara të Amerikës pas nënshkrimit të marrëveshjes për energjinë, mirëpo pas saj raportet ndrruan – por ne edhe duhet ta kuptojmë që Shtetet e Bashkuara të Amerikës nuk duan ta kurthojnë në konflikte ku ato nuk duan të jenë pjesë e saj”, tha ai në T7.
Ndërsa sipas tij, Asociacioni është obligim i nënshkruar në marrëveshjen e vitit 2013 dhe qëndron i tillë.
“Asociacioni ëshë një gjë që duhet ta bëjmë sepse nuk e kemi shfuqizuar marrëveshjen e 2013 e as të 2015. Legalisht ky obligim qëndron, e pse nuk është realizuar deri më tani kjo është një çështje tjetër”, ka thënë ai. /Reporteri.net/.
